المعضلة الاجتماعية هو وثائقي ممزوج بالدراما. بنصح كل حدا بيستخدم شبكات التواصل الاجتماعي انو يشوف هاد الفلم.
The Social Dilemma

:تعليقي بيتلخص بنقطتين

١- هدف تطبيقات التواصل الاجتماعي انو تخليك تستخدمها لاطول وقت ممكن

و اكيد لما انا و انت عم نستخدم هي التطبيقات مو هدفنا انو نخلي هي الشركات تربح منا و نوصلهم لهدفهم. نحن عم نستخدم التطبيقات لنتواصل مع الناس الي بنعرفهم, نشارك معرفتنا, نتعلم من الناس الي موثوقين, و ممكن نوصل خدمتنا او منتجنا للناس الي مهتمين لنمشي شغلنا.
لهيك لازم لازم يكون استخدامنا واعي لهي التطبيقات

٢- الحل لمشاكل شبكات التواصل الاجتماعي هو الاستخدام الواعي لهي التطبيقات

اكيد كتير فينا سمع اهالينا او حدا من الي حوالينا انو هي الشبكات التواصل بتخرب حياتنا, و بتبعدنا عن بعض, و كتير متل هي المشاكل. هاد الحكي صحيح في حال انت ما عندك سيطرة على حياتك ابدا و في حال هني عم يتحكم بحاتك.

الحل بسيط جدا. استخدم التطبيق بعقلانية. انو تضل عالتطبيق كل يوم ٤ ساعات هي مو مشكلة الفيس بوك, هي مشكلتك انت. انو تكون قاعد انت و اصدقائك و عم يحاولو يحكو معك و انت ما عم تسمع ولا مركز معاهن و اخر شي بتقول انو ما عم نبعد عن بعض هي مشكلتك انت مو مشكلة الاسنتاغرام.

الموضوع بيصير اخطر لما يكون الي عم نحكي عنهم هني الاطفال. شبكات التواصل الاجتماعي بيصمم خوارزميات و بيصممو الواجهات بحيث تخليك اطول وقت ممكن عم تستخدمهم. لهيك لازم تعرفو ولادكن او اخواتكن مع مين عم يحكو و شو عم يعملو طول الوقت الي بيقضو عشبكات التواصل الاجتماعي.

هاد كان الي بدي قولو عن وثائقي المعضلة الاجتماعية. وثائقي رائع و بنصح كل الناس يتفرجو عليه. لانو هاد الموضوع بيمس حياتنا و علاقاتنا الاجتماعية بشكل مباشر.

لا تنسو تشوفو الفيديو عقناتي عاليوتيوب:

رابط قائمة الفيديوهات اليومية في قناتي

رابط قناتي على اليوتيوب : محمد بلان – Muhammed Ballan

For other blogs: https://mbh01.com/#blog